Ирбэт тоҥу чинчийэргэ Саха сирин уонна Кытай учуонайдара бииргэ үлэлиэхтэрэ (ВИДЕО)

NVK-ONLINE.RU – Ирбэт тоҥу чинчийэр киини Кытайга Ланьчжоу куоратыгар арыйдылар. Бу күннэргэ Саха сирин учуонайдара Кытайга бара сырыттылар. Бу түмүгэр бииргэ үлэлиир туһунан сөбүлэҥ түһэрсилиннэ.

Кытай норуотун республикатын Тибет провинцията уонна соҕуруулуу-илин өттө ирбэт тоҥҥо турар. Онон кытайдар тыйыс усулуобуйаҕа тутууну ыытарга, ирбэт тоҥу чинчийэргэ быйылгыттан анал тосхол ылынан үлэлэһэллэр.

Кытай омуга технология өттүнэн аан дойдуга хас эмэ хардыы инники иһэр буоллаҕына, учуонайдарын таһыма Россияҕа тиийбэтин билинэллэр. Онон да бу кыһалҕаны төрдүттэн үөрэтээри, баай уопуттаах уонна үрдүттэн үлэлэһэр Саха сирин учуонайдарын кытта бииргэ үлэлэһэр сыаллаахтар.

Ганьсу провинциятын киинигэр Ланьчжоу куоратыгар төрүттэммит Кытай уонна нуучча научнай-чинчийэр тэрилтэлэрин Азия тымныы оройуонун экологиятын уонна инженериятын үөрэтэр аан дойдутааҕы киинигэр быйыл республика 10-ча учуонайа тиийиэхтээх. Аны сайын биһиги дойдубутугар кытайдар 4 учуонайы уопут атастаһа ыытыахтара.

Аны туран, бу сөбүлэҥ иитинэн учуонайдар Москва-Казань түргэн сырыылаах тимир суолу тутарга үлэлэһиэхтэрэ. Кытайдар мантан сиэттэрэн, Пекин-Москва хайысханан маннык суолу тутар санаалааахтар. Онон ирбэт тоҥу чинчийии мээнэҕэ ыытыллыбат.

Аҥаардас бу кииннэри арыйарга Кытай уонна Саха сирин учуонайдара 10 араас таһымнаах симпозиумнары тэрийбиттэрин түмүгэ буолар.

Мантан ыла  номнуо атырдьах ыйыгар Кытайтан ирбэт тоҥу чинчийэр анал үөрэхтээхтэр Саха сиригэр элбэх буолан кэлэллэрэ күүтүллэр.

Прокрутить вверх
Прокрутить наверх